ENDLESS LOVE – Say Good bye to Innocent (Based on a true life event)

Posted on Updated on

10;34;44

Ka thaw dan pangai ang hrimin zana ka zal chu zingkar ka tho nawk a. Chu tuka ka tho ruok chun ka hringnuna ka la tawnhriet ngai lo thil a phur sa leiin mak ka ti hle. Ka Cell Phone chu ka hang en a, inbox a message 3 le missed call 6 zet hi a lo um a. Zana hin ka phone silent in ka sie hlak el khelah, ka imu anhnik em leia ka lo hriet naw khawm ani el thei. Call time chu ka hang en chun 10:30 PM vel a nih a. Message chu a hmatiemin ka hang en nawk pei a, “I imu thu,” “ka fak ding che,” ti le “I suol taluo, call khawm hung call ta nawng ka che, ming call back naw, khawhri ka ni hi I mi ti naw maw? Ka fak el ding che nih,” ti hai hi a lo inziek tawl a. Kei,val zei her hawr le nunghak khawm sai ngai zen zen lo tading chun thil mak pakhat chu a tling phak hle chun ka hriet. A tu tak am ani ding aw? Ti ngaituona ngawt chun ka lungril a suksip a. Tlangval ka la ni leiin, nunghak ni ding chun ka zuk ring tawp el a. Ming call back naw ti sienla khawm, hriet ka nuomnan a hne hrim hrim ni ding a na, hang call nuomin ka kut hi anza dawp dawp zing el a. Zantieng dar 3 vel chun kan sum thei tanaw tawpkhawk ni ta veng a tih, ka lo hmet zawt el a. Message thawn lova, a call a ka call chu thil lawmumin anchang letling lemin ka hriet! Papui pakhatin a mi hung dawn chu hril ding a vang cham cham! (hahah) Nuizat um zawngin a thawk lem a, a umzie ruok chu ka hriet naw hle thung.  Kawng khat ngaituo chun, ama pa khawm khan a mik a mak a hriet naw hle leiin, a thawtu kha midang ni dingin ngaituona ka nei tho a. Lungril ruka chu a tu tak am a ni ti hriet tumna kha a bo chuong nawh. Chuong lungril ngaituona buoi ang reng, nui inza deu met bawka ka um lai, zan dar 8 vel chun “mi indu pa?” ti message hi ka dawng nawk kau a. Aw, ama ngei hi a ni nawk awm hi ka ta, mawl tutin “tum I nih” ka hang ti thuoi a. Ama khawm chun ip set set chuong lo chun a hming le umna hai chu a hmatiemin a hung hril pei a. “Iengtinam I mi hriet?” ka ti le, “Lala (hming thleng) in naw maw?” a mi ta. Lala I ni sie chun ieng leiin am ie ka hriet naw ding che tiin a mi hriet dan hai khawm chu frank deuin a mi hril nawk pei a. A ngaina ka hriet naw khawp el, ka buoi map. A tawp a tawpa chu, ka ruolha’n min hriettir chuong lova ka hming le contact number magazine pakhat, PENPAL column a an lo sie kha lo ni zing a.  Chu khawm chu a zinga ka hriet suok chau a nih.

Chuongchun, inbiekna chu kan sunzawm pei a. Message khawm dit tawk ta lovin, ka hang call thuoi a leh, a rawl khawm chu ngaino bei zet kha lo na. A tawng nuomin, a rawl mawi tak dam kha nipui lum lai taka virthli hung hrang velin a mi mut changa ei hadam rawng rawng angin, ei natna le lungngaina po po mi thawi dam theitu ni hiel dingin ka zuk ring a. Aman phone a la nei naw thu le, a pa phone a hmang a ni thu chu a mi hril leiin ka hriet chieng ta hle. Ka lungril buoina po po khawm thawk le khatin a mi thawi dam pek nghal. Kan vawikhat inbiekna khawma ka tading chun daktawr ropui tak a tling phak nghal a nih. A ngirhmun ka hriet bawk leiin, a hun nei remchang hai chu taima takin ka nghak hlak a. Ka neinan a tlin si naw leiin handset hang present tawp nuom hle lang khawm ka thaw chuong em naw a. Zana kher lo khawm, suna hai le a remchang huna hai chu a mi hung text ve zeu zeu hlak bawk. Kei khawm chu zan dar 10 hnunga zal ngai lo kha chutaka inthawk chun 12 dar 1 chen chen dam ka meng ta hlak a. Kan chukna lem chu a mi sukbahla hran chuong nawh. Ei inhnikna le nuom zawng tak thaw na na na chu a hlawkin a lo inhawi khawp el. A rawl mawi tak ka hriet chang hin chu hadam rawng rawng hin kan hriet hlak a. Zanrila lem hin chu a rawl hi an no in a mawi zuol hlak. A ngaithla tu midang um pal an tih ti inlau um tak a nih. Chuong ang rawl mawi, mi ngaina tu anka ngaithlak theia ka umna kha mi vangnei chung chuonga kan hriet ve na a lo nih. Ruol anga in pawl le hohlim hlak ni inlang khawm, kan inbiek ngun a, kan hang inkawp tak tak chu ruol khel tieng met ni ta in ka hriet hiel a.

Hun sawt rak lo a chun, ama khawmin phone a hung nei ve ta a. A nei le inruol chun a number chu a mi hung hril nghal a. Nang ka hril hmasa tak che, chun midang tukhawm ka hril naw ding a ti bawk a. A tawng dana inthawk le a thil hril nuom le khawsak, ama hrilna a inthawka ka hriet danin khel hril hmang mi ani naw leiin titak deua a mi hril chu indik ngei dingin ka ring. Phone a nei ta bawk lei chun, sun le zan chawl lovin kan hung inbiek thei ta a. Ka lungril chu lawmna in a sipliem zing hlak a nih. College a hai dam te chun ka phone hi ka mansa sunga ka thun hman meu nawh. Desk hnuoia hin tu mi hriet lo hin ka khel rat rat zing hlak a. Ka kut khawmin a by-heart hne ta hle khawm ni ding a na, en lo a ka type khawmin message hi ka type suol ngai bek chuong nawh. A thil hril nuom zawng hai le a nuom zawng ngaituo chun kann milpui zawng tak a nih a. Nitin le hun tin hai chu a min ngainat zuol tirtu an hung ni ta pei a. Mithienghlim lawr dinga Isu hung ding nekin ka phone a message hung lut ding chu ka tung lem hiel niin kan hriet a. Message ka dawng inkhat deu chang chu ka khuo sawt rum rum hman hlak a nih. Ama khawm a message ka reply vat naw chun a hung nuor hman vang hlak a. A tawng dan le thil hril haia inthawk chun ama khawmin a mi ngaina ve ta hle ni ti chu ka hriet chieng hle. Nitin, huntin a kan thil thaw, kan hungna le fena hai chen khawm kan inhriet ta vawng ni deu takin ka hriet. A message ka dawng inkhat deu hin chu uisa chartang inhnik tawk tak machi bo a suong ang el hin, ka nun a hin baksamna nei ruoiin kan hriet hman hlak.

Ka kum le ngirhmun ngaituo chun nuhmei hai nei a khawsak inrel hun ni ta lang khawm, nunghak dang mel nuomna ka nei chuong nawh a. Ruoltha nupa a insiem mi tam tak an um ti ka hriet a, keini chunga khawm a tlung thei nawh tunam ti thei chuong a ta? Ka hringnun a hin hmun insang tak a hluo an tah ti chu tu mi hril khawm ngai lovin, ei thil fak hai hi phing suk khawpna ding a nih ti ka hriet tlukin kan hriet chieng tawk. Kan khawsakna hlak chu muol le tlang tam takin a mi the hrang sih a, a sakhmel tawng nuom hle hlak lang khawm, vana ra ang hiel a nih. Tulai ang hin fb khawm a la um naw leiin a thlalak takngiel khawm ka hmu thei nawh. A mihriem tak khawm hmuna dinga hun remchang khuonu’n a mi pek naw hi khawvela pawi ka ti tak hai laia pakhat chu a nih. Ka hringnuna hin remruottu’n a lo ruotsa naw khawm a ni el thei. A thlalak ruok chu ruolhai thangpuina zarin ka hmu thei leiin ka lawm hle a. A thlalak ka hang hmu ni lem chun, Awh! hi zet hi a ni hi khuonu ruot lawk chu! hang ti phawng ka nuom hiel a nih. A hmai inbiel kak le a mitmeng fel le mawi tak hai chun ama ka ngainatna a mi sukzuol pek a. Ama leh damsung hun hmang tlang ding ni inlang chu, ka thi chenin inhawi ting ka ta, dam man a um hmel ie ti hai dam te chu tu mi hrietpui lo chun ka khatin ka ngaituo neu neu hlak a. Ka lungrila hmun a hluo rawn zie le, ka hringnun sukkimtu chu ama chau a ni thu chu hun remchang hmasa taka hril el ta dingin thuthlukna ka siem tah a. An hril HMANGAINA hi thil um takzet a ni chun, hieng ang bak hi ni dingin ka ring chuong nawh.

Kan sum zo ta naw bawk leiin zankhat chu ka hril ta phawng el a. Ka lungril a hluosip zie le kawppuia siem ka nuom thu hai dam chu inthlahrung der lovin a hmatiemin ka hril ta zawt zawt a. Mak ti hmel deuin mi dawn sien khawm, a lungril tak chun a lawm ve tho a ni ti chu a tawng dana inthawk chun kan hmai bik nawh. Amiruokchu, a mi dawnna “ka dit naw che, anachu ka ngai che” a ti  ruok hi chu mak ka tiin hrietthiem intak ka ti hle thung. Tu chena ka lungrila peihawn thei lo le mi sukbuoitu, ka ngaituona fa hektu a la ni zing hlak. An khuo a zu fe a zu pan ding khawm ni lang, an run sunga leng lut theina chanvo ka nei naw ding zie chu kan hriet hle tho a. Kohran hai ro inrelbawl dana khawm puitlinga an la tiem ni lo a na. Conway Twitty hla phuok “Don’t cry Joni” ti a “You’re just fifteen and I’m twenty two, and Joni I just can’t wait for you,” ti lai ang vel deu hi ni takin ka hriet kan ngirhmun hih! Kei khawm chu kawppui hai neia khawsak relbawl hun ka ni ta bawk leiin, hmabak peia hung hlawtlinga kawppui hai khawm tha tak hung nei ngei dinga ditsakna vochuom inhlanin theinghil zai chu ka cham lova rel a tul tah a.

Chuongchun, a tawp tah a…..!!!!

Guwahati: 18th March, 2014

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s