Recycle Bin

“Sometimes all you can do is smile. Move on with your day, hold back the tears and pretend you’re okay.” ~ Anonymous

Recycle Bin hi tawite in hang hrilfie inla. Recycle ei ti chun thil siem danglam annawle siem thar nawk, thil thanaw le hmang tlak ta lohai khawl hmanga hmang tlak le ṭha taka an hung siem suok nawk hi a nih. Hi thil thawna a hin thil ṭhenkhat chu a pangngai char an siem suok nawk dam, ṭhenkhat a neka ṭha lema an siem suok nawk khawm a um hlak. Vai ruol le mi taima ṭhenkhatin thir sie le plastic bottle ṭha lo an zawng khawm hlakhai hi recycle ding an nih. Plastic bottle hai hi khawl hmangin plastic bottle bawka an siem nawk a um a, ṭhenkhat plastic bottle pangngai neka changkang le ṭha lema an siem suok a um ve bawk. Recycle chu ei hrietfie ta ring a um a. Recycle Bin ei ti chun thil ṭha nawhai recycle dinga an sie khawmna bawm ti inla a hrietfie a awlsam tak ring a um. Computer a chun Recycle Bin a hin file ei delete tah hai a um hlak a, ei dit nawk a um chun file kha ei nuom chun ei restore thei a, ei dit ta der nawhai chu chatuonin ei computer-ah um nawk ta lo dingin ei sukbo (delete) sawng thei bawk.

Ringtu nuna dingin Recycle Bin hi ei hrietchieng a pawimaw hle. A hmasataka ding chun, chatuon hringna (sandamna) tluontling ei chang theina dingin Pathienin mihriemhai hi a mi recycle a nih. Eden bawsietna leia Pathien le inṭhe, chatuon hremna tuok ding le mi bohmanghai kha, Pathienin a naupa neisun hmangin Kalvari Kraws-ah a mi hung recycle a, Krista thina chu ei thina-ah mi puong pekin, Ama le inzawmna nei ta lohai kha nau nina ngirhmun mi’n changtirin, vanram inhawiah Ama le kumkhuoa cheng hmunkhat thei dingin Kalvari Recycle Bin hmangin a mi hung siemthar nawk a nih. Kalvari Recycle Bin a hin I lo um ve am leh? Hi Recycle Bin a um le siemthar nawkhai ta dingin thiemnaw chang ṭina hrim a um ta nawh (Rom 8:1).

Kalvari Recycle Bin a siemtharhai khawm hin, ringtu nun ei khalna kawngah vawi tamtak chu Pathienin mi recycle dingin Recycle Bin-ah a mi sie nawk hlak. Ei hlapu Pu Solomon V Hmar chun, “Van sang a mi vuongpui, van hmun a mi fangpui, Chu hmuna inthawk chun a mi thlak tla nawk hlak; Thlipui, ruopui umna hmuna a mi ṭhuoi a, A ram le a felna a mi’n chuktir nawk hlak” ti’n indik le mawi takin hla a lo phuok a. Hi hlaa chang 2-na “Hlimna a hung chuoiin, ka kal ka pen buoi a, Ka khawvel an chinbuoi, fe ngaina ka hriet nawh; Sienkhawm sum dum karah var a hung inlang a, A mi kawkhmu nawk hlak ka van lampui tieng chu” a ti lem hin chu umzie le hril tamtak a nei a nih. Mihriemhai hi ei hlim lai nanȃ na chun inhawi ei ti a, thuzawm khawm a awlsam hlak. Harsatna le buoina dang dangin ringtu a’n tuokpui pha, mi puitling tak tak dinga ngaihai khawmin harsa tiin an tlu nawk hlak. Sum dun kara var hmu thei hi ringtu nuna pawimaw ve tak a nih. Harsatna le tuornahai hi thlarau rama dingin malsawmna a nih ti lo palsuoktuhai chun, “Aw harsatna Lal hmel hmuna, lungchimte in lo pawm ka che, duot takin lo enkawl ka ti che, harsatna a dang a la um am?” ti’n huoisen takin harsatna an huom zie hla-in an lo kheksuokpui thei ve tlat!

Thlarau rama chau lo khawm, ni tina ei khawsakna a khawm hin Pathien chun ei ngirhmun pangngai neka ṭha le hmang tlak lem ni dingin a changin a mi recycle ve hlak. Natna, retheina, mangangna, khawsawt/lusunna le a dang dang ei tuok mekhai hi, tuta neka ṭha lema mi siemsuok a nuom leia Pathienin Recycle Bin-ah a mi khum khawm a lo ni thei. Ieng Recycle Bin tak a’m I um leh? Rangkachak khawm meia rawtuiin a ṭha khat ngawt an laksuok hlak angin, Pathienin hmang tlak le mi ṭha lem ei hung ni theina dingin, a chang po leh siemthar nawk dingin Recycle Bin a hin a mi khum hlak a lo nih. Pathien remruotna hrechieng thei dingin ei lungril le theina po poa ṭhangin Ama dawr ei tiu. Ruolṭha le laina, ei inthlawppui ṭhanghai chu an lungril ngaituona khawm ei hriet thei hlak. Chu ang bawkin, Pathien le inpawlna nun nei ṭhanghai chu Ama leh inzawmna ṭha tak an nei a, Pathien lungril ditzawng khawm an hriet thei hlak.

Ringtuhaiin thil ei suksuol lei khawmin Pathienin Recycle Bin-ah a mi khum chang a um hlak bawk. Pathienin a theida tak chu, mi titak lo, kawp le inkai dûta um, lum si loa dei chuong bawk lo, Laodikei Kohran anga lum pȇlpuol hi a nih. A hun laia Pathien ditzawng ngaituoa ei insiemṭha naw chun, Computer Recycle Bin a file ei sukbo sawng thei angin, Pathien chun danglam takin a mi recycle thei zing. Pathienin Recycle Bin-ah a mi khum hlakna san tak chu, a neka ṭha lema mi siemthar a nuom hlak lei a nih ti ruok chu ei hrietchieng a pawimaw thung.

Rengkai: 6th June, 2020